طريقة عمل كبسة لحم

1/2 كيلو لحم اي نوع

كوب مليان أرز بسمتي حسب عدد افراد الاسرة انا عملت حوالي كوب مليان

معلقتين كبار سمنه او زبدة

1 بصلة سليمة

ملح

فلفل اسود

بهار كبسة من عند العطار

رشة زنجبيل بودرة

ورق لورى

رشة قرنفل بودرة

شوية حبهان بودرة او هيل

حتة صغيرة مستكة

قليل زعفران او كركم او الاثنين معا

بابريكا

رشة شطة

بهار لحمة

ليتر مياه ساخنه تكون مغطية مستوى اللحمة

اول حاجة بعد تقطيع اللحم وغسلها كويس بحط مياه في الحلة حوالي ثلثي الحلة واغليها وبعدين اضيف اللحمة بدون اي توابل

ابدا اشيل الريم او الزفرة اللي بتطلع على الوجه حوالي عشر دقائق لحد مايكون الشوربة صافية خالص هطفي عليها وبعدين اجهز حلة تانية واضيف معلقتين سمنة وفلفل اسود ومستكة وحبهان وبصلة سليمة متنضفة فقط

واضيف اللحمة بس بدون الشوربة ودى طريقتي العادية في سلق اللحمة بتطلع الشوربة تحفة هشوح اللحمة شوية صغيرين وبعدين أضيف شوربتها واخفف لحد ماتستوى

لكن عشان هنعملها كبسة فهضيف بقى بهارات الكبسة بتاعتنا كلها الكركم والفلفل والبهارات والشطة وورق اللورى والهيل وبهار الكبسة والزعفران ان وجد وكل البهارات

واخفف عاللحمة واسيبها تستوي عشان استخدمت ضاني فاستوت معايا في حوالي ساعة بالكتير اوي لانى بسيبها تستوي خالص لحد ماتدوب كدة 😋

استوت نضيف الملح بتاعنا ونستنى شوية ونطفي النار اضيف الرز بتاعى عادي في الشوربة او نعمله في حلة تانية ونضيف عليه اللحمة والشوربة وممكن نزود شوية كركم او زعفران لزيادة اللون الاصفر

الرز البسمتي بيحتاج ضعف ماء الرز المصري انا بنقع الرز البسمتي قبل الطبخ بساعة او نص ساعة حسب وقتى وبضيف كمان ضعف مقدار ماء الرز المصري على حسب نوع الرز وممكن تضيفي شوية لو اول تجربة ولو احتاج زودى المهم النار تكون منخفضة جداً ونحط شياطة عشان يستوي على البخار بياخد تقريبا نصف ساعة ممكن تتقدم مع سلطة دقوس او سلطة زبادي او خضار بسلة (بازيلا) وجزر..